ನಿತ್ಯ ಒಂದಿಲ್ಲೊಂದು ತಾಂತ್ರಿಕ ದೋಷದಿಂದ 4-5 ಬಿಆರ್ಟಿಎಸ್ ಬಸ್‌ಗಳು ಕೆಟ್ಟು ನಿಲ್ಲುತ್ತಿರುವುದು ಒಂದೆಡೆಯಾದರೆ, ಬಿಆರ್ಟಿಎಸ್ ಬಸ್‌ ವ್ಯವಸ್ಥೆಯೇ ಅವ್ಯವಸ್ಥೆಯ ಆಗರವಾಗಿದೆ. ಮುಂಗಡ ಹಣ ಪಾವತಿಸಿ ಟಿಕೆಟ್‌ ಪಡೆದು ಪ್ರಯಾಣಿಸುವವರು ಬಿಆರ್ಟಿಎಸ್ ಸೇವೆಗೆ ಹಿಡಿಶಾಪ ಹಾಕುವಂತಾಗಿದೆ.
ಹುಬ್ಬಳ್ಳಿ-ಧಾರವಾಡ ಮಧ್ಯದಲ್ಲಿ ತ್ವರಿತ ಸಂಚಾರ ಸೇವೆ ಒದಗಿಸುವ ಉದ್ದೇಶದಿಂದ ಕೋಟ್ಯಂತರ ರೂ. ವೆಚ್ಚದಲ್ಲಿ ಪ್ರತ್ಯೇಕ ಕಾರಿಡಾರ್‌ನೊಂದಿಗೆ ಬಿಆರ್ಟಿಎಸ್ ಯೋಜನೆ ಜಾರಿಗೊಳಿಸಲಾಗಿದೆ. ಆದರೆ, ಪ್ರಯಾಣಿಕರಿಗೆ ಈ ತ್ವರಿತ ಸಂಚಾರ ಸೇವೆ ಅನುಕೂಲಕರವಾಗುತ್ತಿಲ್ಲ.
15-20 ಬಸ್‌ ದುರಸ್ತಿಗೆ
ತ್ವರಿತ ಸಂಚಾರ ಸೇವೆ ಒದಗಿಸಲು ಪ್ರತಿ ಬಸ್‌ಗೆ 84.60 ಲಕ್ಷ ರೂ. ವೆಚ್ಚದಲ್ಲಿಒಟ್ಟು 100 ಬಸ್‌ಗಳನ್ನು ಖರೀದಿಸಲಾಗಿದೆ. ಈಗಾಗಲೇ ಈ ಪೈಕಿ 15-20 ಬಸ್‌ಗಳು ತಾಂತ್ರಿಕ ದೋಷದಿಂದ ಕೆಟ್ಟು ನಿಂತಿವೆ. ಇನ್ನುಳಿದ ಬಸ್‌ಗಳು ಸದ್ಯ ಹು-ಧಾ ಮಧ್ಯದಲ್ಲಿ ಪ್ರತ್ಯೇಕವಾಗಿ ಎರಡು ಬದಿಯಿಂದಲೂ ಬಸ್‌ಗಳು ಕಾರ್ಯಾಚರಣೆ ನಡೆಸುತ್ತಿವೆ. ಅವುಗಳಲ್ಲಿಒಟ್ಟು 81 ಬಸ್‌ಗಳಿವೆ. 100 ಬಿ-13 ಬಸ್‌, 200 ಎ-9 ಬಸ್‌, 201ಬಿ-25 ಹೆಸರಿನಲ್ಲಿ ಸಂಚಾರ ನಡೆಸುತ್ತಿವೆ. ಆದರೆ ಈ ಬಸ್‌ಗಳಿಗೆ ನಿಗದಿತ ಸಮಯವಿಲ್ಲ. ಬಂದರೆ ಏಕಕಾಲಕ್ಕೆ 2-3 ಬಸ್‌ ಬರುತ್ತವೆ. ಇಲ್ಲವೇ 10-15 ನಿಮಿಷ ಒಂದೂ ಇರುವುದಿಲ್ಲ. ಮೊದಲಿದ್ದ ಬಸ್‌ ಟ್ರ್ಯಾಕಿಂಗ್‌ ವ್ಯವಸ್ಥೆ ಹೆಸರಿಗಷ್ಟೇ ಇದೆ.
ಕೆಟ್ಟು ನಿಲ್ಲುವುದು ಸಾಮಾನ್ಯ…
ಇನ್ನು ಕೆಲವು ಬಸ್‌ಗಳು ಆಗಾಗ ರಸ್ತೆ ಮಧ್ಯೆ ಕೆಟ್ಟು ನಿಲ್ಲುತ್ತಿರುವುದು ಸಾಮಾನ್ಯವಾಗಿದೆ. ಇದೇ ಕಾರಣಕ್ಕಾಗಿ ಟೈಂ ಟೇಬಲ್‌ ಸರಿಯಾಗಿ ಫಾಲೋ ಅಪ್‌ ಆಗುತ್ತಿಲ್ಲ. ಇದಕ್ಕೆ ಪರ್ಯಾಯ ಬಸ್‌ಗಳಿದ್ದರೂ, ಆ ಟೈಂನಲ್ಲಿ ಬಸ್‌ಗಳನ್ನು ಓಡಿಸಲಾಗುತ್ತಿಲ್ಲ. ಇನ್ನೊಂದೆಡೆ ನಿಲ್ದಾಣದಲ್ಲಿಯೇ ಸುಸೂತ್ರವಾದ ಬಸ್‌ಗಳಿದ್ದರೂ, ಪ್ರಯಾಣಿಕರಿಗೆ ಸೇವೆ ನೀಡಲು ಸಿಬ್ಬಂದಿ ನಿರಾಕರಿಸುತ್ತಿದ್ದಾರೆ. ನೂರಾರು ಜನ ನಿಲ್ದಾಣದಲ್ಲಿ ಗಂಟೆಗಟ್ಟಲೇ ಕಾಯುವಂತಾಗಿದೆ.
ಪರಿಹಾರವಿಲ್ಲ..
ಇಂತಹ ಸಮಸ್ಯೆಗಳ ಬಗ್ಗೆ ಸ್ಥಳೀಯವಾಗಿರುವ ಕಂಟ್ರೋಲರ್‌ ಗಮನಕ್ಕೆ ತಂದರೂ, ಪರ್ಯಾಯ ಬಸ್‌ ವ್ಯವಸ್ಥೆ ಕಲ್ಪಿಸುತ್ತಿಲ್ಲ. ಬದಲಾಗಿ ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳುವಂತೆ ಹೇಳುತ್ತಾರೆ. ಮಧ್ಯಾಹ್ನವಂತೂ ಟಿಕೆಟ್‌ ನೀಡುವವರೇ ಇರಲ್ಲ., ಇದ್ದರೂ, ಕಣ್ಣೆದುರೇ ಬಸ್‌ ಇದ್ದರೂ ಹೋಗುವುದು ತಡವಾಗುತ್ತದೆ ಎಂದು ಹೇಳುತ್ತಾರೆ. ಈ ಬಗ್ಗೆ ಪ್ರಶ್ನಿಸಿದರೆ, ಟಿಕೆಟ್‌ ತೊಗೊಂಡು ಕಾಯುವುದಾದರೆ, ಟಿಕೆಟ್‌ ಪಡೆಯಿರಿ, ಇಲ್ಲವಾದರೆ ಬೇರೆ ವ್ಯವಸ್ಥೆ ಮಾಡಿಕೊಳ್ಳಿ ಎಂದು ನೇರವಾಗಿ ಹೇಳುತ್ತಾರೆ. ತಕ್ಷಣಕ್ಕೆ ಪ್ರಯಾಣಿಕರು ಏನು ವ್ಯವಸ್ಥೆ ಮಾಡಿಕೊಳ್ಳಬೇಕು? ಎಂದು ಬಿಆರ್ಟಿಎಸ್ ಬಸ್‌ ಪ್ರಯಾಣಿಕ ಸುನೀಲ ಪ್ರಶ್ನಿಸಿದರು.
ಹು-ಧಾ ಮಧ್ಯದಲ್ಲಿ ಹೆಚ್ಚಿನ ಸಂಖ್ಯೆಯ ಎನ್‌ಡಬ್ಲ್ಯುಕೆಆರ್‌ಟಿಸಿ ಬಸ್‌ಗಳು ಓಡಾಡುತ್ತಿಲ್ಲ. ಬಿಆರ್ಟಿಎಸ್ ಬಸ್‌ಗಳೇ ಅನಿವಾರ್ಯ. ಇಲ್ಲವೇ, ಖಾಸಗಿ ವಾಹನದಲ್ಲಿ ಓಡಾಡಬೇಕು. ಹೀಗಿದ್ದಾಗ ಅಗತ್ಯ ಸೇವೆ ಒದಗಿಸಬೇಕಾದವರೇ ನಿರಾಸಕ್ತಿ ತೋರಿದರೆ ಮುಂದೇನು? ಬಿಆರ್ಟಿಎಸ್ ಬಸ್‌ ಸೇವೆಯನ್ನೇ ಸ್ಥಗಿತಗೊಳಿಸಿ ಮೊದಲಿನಂತೆಯೇ ಹು-ಧಾ ಮಧ್ಯೆ ಸಾರಿಗೆ ಸೇವೆ ಆರಂಭಿಸಿದರೆ, ಇನ್ನೂ ಒಳಿತು ಎನ್ನುವುದು ನಿತ್ಯ ಓಡಾಡುವ ಪ್ರಯಾಣಿಕರ ಒತ್ತಾಯ.
ಟೈಂ ಟು ಟೈಂ ಬಾರದ 100ಬಿ
ನಿಯಮಿತ ನಿಲುಗಡೆ ಹೊಂದಿರುವ 100ಬಿ ಬಸ್‌ಗಳ ಸೇವೆ ಸಮರ್ಪಕವಾಗಿ ಸಿಗುತ್ತಿಲ್ಲ. ಟೈಂ ಟು ಟೈಂ ಬಸ್‌ಗಳು ಬರದೇ ಪ್ರಯಾಣಿಕರು ಪರದಾಡುವಂತಾಗಿದೆ. ಬೇಗ ಹೋಗಬೇಕೆನ್ನುವವರು 100ಬಿ ಬಸ್‌ಗಾಗಿ ಗಂಟೆಗಟ್ಟಲೆ ಕಾಯ್ದರೂ ಅದು ಬರುವುದಿಲ್ಲ. ಹೀಗಾಗಿ ಪ್ರಯಾಣಿಕರು ನಿರಾಶರಾಗಿ ಸಿಕ್ಕ ಬಸ್‌ನ್ನೇ ಏರುವುದು ಸಾಮಾನ್ಯವಾಗಿದೆ. ಕೆಲವೊಮ್ಮೆ ಬಿಆರ್ಟಿಎಸ್ ಚಾಲಕರು, ಅನಗತ್ಯ ಕಾರಣಗಳನ್ನು ನೀಡಿ, ಹೊಸೂರ ಬಸ್‌ ನಿಲ್ದಾಣಕ್ಕೆ ಪ್ರಯಾಣಿಕರನ್ನು ಇಳಿಸಿ ಹೋಗುವುದು ಕೂಡ ಸಾಮಾನ್ಯವಾಗಿದೆ.
ಸಿಬ್ಬಂದಿ ನಿರ್ಲಕ್ಷ್ಯದಿಂದ ಬಿಆರ್ಟಿಎಸ್ ಬಸ್‌ಗಳ ಸೇವೆ ಪ್ರಯಾಣಿಕರಿಂದ ದೂರವಾಗುತ್ತಿದೆ. ಅಧಿಕಾರಿಗಳು ಈ ಬಗ್ಗೆ ಗಮನ ಹರಿಸಬೇಕು. ಇಲ್ಲವಾದರೆ, ಬಿಆರ್ಟಿಎಸ್ ಬಸ್‌ ಸೇವೆ ಸ್ಥಗಿತಗೊಳಿಸಿ ಮೊದಲಿನಂತೆ ಹುಬ್ಬಳ್ಳಿ-ಧಾರವಾಡ ಮಧ್ಯದ ಸಂಚಾರ ಸೇವೆ ಒದಗಿಸಬೇಕು ಎಂದಿದ್ದಾರೆ ಪ್ರಯಾಣಿಕ ಒತ್ತಾಯ.
ಬಿಆರ್ಟಿಎಸ್ ಬಸ್‌ಗಳ ಸಂಚಾರವು ಸಮಯಕ್ಕೆ ಸರಿಯಾಗಿ ಓಡಾಡುವ ಮೂಲಕ ಪ್ರಯಾಣಿಕರಿಗೆ ಅಗತ್ಯ ಸೇವೆ ಒದಗಿಸುತ್ತಿವೆ. ಇದರಲ್ಲಿಯಾವುದೇ ತೊಂದರೆ ಉಂಟಾಗುತ್ತಿಲ್ಲ. ಒಂದು ವೇಳೆ ಟೈಂ ಟು ಟೈಂ ಸೇವೆಯಲ್ಲಿತೊಡಕಾಗುತ್ತಿದ್ದರೆ, ಸಿಬ್ಬಂದಿಗೆ ಈ ಬಗ್ಗೆ ಸೂಚಿಸಿ ಸರಿಪಡಿಸಲಾಗುವುದು ಎಂದು ಅಧಿಕಾರಿಗಳು ಹೇಳುತ್ತಾರೆ.
