ಹುಬ್ಬಳ್ಳಿ
ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆ(ಕೆ.ಎಸ್.ಸಿ.ಎ.) ಧಾರವಾಡ ವಲಯದ ೧೪ ವರ್ಷದವರೊಳಗಿನ ಅಂತರ-ಕ್ಲಬ್ ಲೀಗ್ ಪಂದ್ಯಗಳು ಮುಗಿದಿದ್ದು, ಪ್ರತಿ ಗುಂಪಿನಿಂದ ಮೊದಲಿನೆರಡು ಸ್ಥಾನ ಪಡೆದ ತಂಡಗಳು ಮಂಗಳವಾರದಿಂದ ಪ್ರಾರಂಭವಾಗಲಿರುವ ಪ್ರಿ-ಕ್ವಾರ್ಟರ್‌ಫೈನಲ್ ಪಂದ್ಯಗಳಲ್ಲಿ ಸ್ಪರ್ಧಿಸುತ್ತಿವೆ.
ಮೊದಲ ಸುತ್ತಿನ ನಾಕೌಟ್ ಪಂದ್ಯಗಳು ಮೂರು ದಿನ ನಡೆಯಲಿದ್ದು ಮೊದಲ ದಿನ(ಅಕ್ಟೋಬರ್ ೨೭) ಹುಬ್ಬಳ್ಳಿ ಸ್ಪೋರ್ಟ್ಸ್ ಕ್ಲಬ್(ಬಿ) ತಂಡ ಬೆಳಗಾವಿಯ ಯೂನಿಯನ್ ಜಿಮಖಾನಾ(ಎ) ತಂಡವನ್ನು ಬೆಳಗಾವಿಯ ಎಸ್.ಕೆ.ಇ. ಪ್ಲಾಟಿನಂ ಮೈದಾನದಲ್ಲಿ ಎದುರಿಸಲಿದ್ದರೆ, ಧಾರವಾಡದ ಕ್ರಿಕೆಟ್ ಕ್ಲಬ್ ಆಫ್ ಕರ್ನಾಟಕ(ಸಿ.ಸಿ.ಕೆ.) ತಂಡ ರಾಜನಗರದ ಕೆ.ಎಸ್.ಸಿ.ಎ. ಸ್ಟೇಡಿಯಂನಲ್ಲಿ ನಗರದ ಶ್ರೀ ದುರ್ಗಾ ಸ್ಪೋರ್ಟ್ಸ್ ಅಕಾಡೆಮಿಯ ಸವಾಲನ್ನೆದುರಿಸಲಿದೆ.
ಇಲ್ಲಿಯ ಚಾಂಪಿಯನ್ಸ್ ನೆಟ್ ಕ್ರಿಕೆಟ್ ಕೋಚಿಂಗ್ ಸೆಂಟರ್ ಹಾಗೂ ಲಕ್ಷ್ಯ ಕ್ರಿಕೆಟ್ ಅಕಾಡೆಮಿಗಳ ನಡುವಿನ ಪಂದ್ಯ ಬೆಳಗಾವಿಯ ಕೆ.ಎಸ್.ಸಿ.ಎ. ಸ್ಟೇಡಿಯಂನಲ್ಲಿ ನಡೆಯಲಿದೆ.
ಬುಧವಾರ(ದಿನಾಂಕ ೨೮) ಇನ್ನೂ ಮೂರು ಕ್ವೌರ್ಟರ್‌ ಫೈನಲ್ ಪಂದ್ಯಗಳು ನಡೆಯಲಿದ್ದರೆ, ಇನ್ನುಳಿದ ಎರಡು ಕ್ವೌರ್ಟರ್‌ ಫೈನಲ್ ಪಂದ್ಯಗಳು ಗುರುವಾರ(ದಿನಾಂಕ ೨೯) ಆಡಲ್ಪಡಲಿವೆ.
